Joriy yil 7 mayda O‘zbekiston Respublikasi Prezidenti huzuridagi Strategik va mintaqalararo tadqiqotlar institutida (SMTI) Konrad Adenauer fondining Markaziy Osiyodagi vakolatxonasiga yangi tayinlangan rahbari Andre Algermissen bilan uchrashuv bo‘lib o‘tdi.

Muzokaralar chog‘ida O‘zbekistonda amalga oshirilayotgan ijtimoiy-siyosiy va iqtisodiy o‘zgarishlar, O‘zbekiston-Germaniya hamkorligining holati va uni rivojlantirish istiqbollari muhokama qilindi. 2024-yilda SMTI va Fond o‘rtasidagi hamkorlik yuzasidan atroflicha fikr almashildi.

Suhbat chog‘ida germaniyalik mehmonga O‘zbekistonda amalga oshirilayotgan islohotlar, tashqi siyosatning ustuvor yo‘nalishlari, jumladan, Markaziy Osiyoda yaxshi qo‘shnichilikni mustahkamlash, xavfsizlik va barqarorlikni ta’minlash borasida amalga oshirilayotgan ishlar haqida batafsil ma’lumot berildi.

O'z navbatida, K.Adenauer fondi vakili A.Algermissen O‘zbekistonda Prezident Shavkat Mirziyoyevning bevosita rahbarligi ostida keng ko‘lamli o‘zgarishlar amalga oshirilayotganini alohida ta’kidladi.

U O‘zbekistonda olib borilayotgan islohotlar siyosatini qo‘llab-quvvatlashini bildirib, mamlakatni rivojlantirishning barcha ustuvor yo‘nalishlarida o‘zaro manfaatli hamkorlikni kengaytirish va chuqurlashtirishdan Germaniya manfaatdor ekanligini qayd etdi.

Suhbatdoshlar so‘nggi yillarda yangi rivojlanish bosqichiga qadam qo‘ygan O‘zbekiston-Germaniya munosabatlarining jadal rivojlanishini yuqori baholadilar, buni muntazam, ochiq va ishonchli muloqotlar, jumladan, oliy darajadagi muloqotlar tasdiqlaydi.

Uchrashuv ishtirokchilari SMTI va K.Adenauer jamg‘armasi o‘rtasidagi hamkorlikni muhokama qilishga alohida e’tibor qaratdilar. Tomonlar mintaqaviy hamkorlikni mustahkamlash, iqlim o‘zgarishi oqibatlarini yumshatish va ularga moslashish, transport-kommunikatsiya aloqalarini rivojlantirish, oziq-ovqat xavfsizligini ta’minlash bilan bog‘liq keng ko‘lamli masalalar bo‘yicha yaqin hamkorlikni davom ettirishga tayyor ekanliklarini ta’kidladilar.

Suhbat yakunida rejalashtirilgan qo‘shma tadbirlar ikki tomonlama hamkorlikning mavjud salohiyatidan to‘liq foydalanishga xizmat qilishiga o‘zaro ishonch bildirildi.